سكوريت و لا شفاف
فعلا احنا ما بنستحي…
فعلا شرش الحيا طق .. و بطلنا نحترم المختار ..
مش معقول يا ابو فهمي بدك ينزلوا تسعيرة الكهرباء … ميشان تحرج المختار مع الدول المانحة ويفقد شفافيته ومصداقيته..
يا ابو فهمي بدك ما يظل المختار يطسنا بظرايب مشان المانحين يقولو احنا مش شفافين..
بدك يشغل اشكالك الهاملة، ويوظفهم ميشان يصير زجاج سيكوريت مش شفاف…
وحد الله .. يا ابو فهمي .. انته مش فاهم شو يعني شفافية و لا قادر تستوعب معنى شفاف…
شفاف يعني لا لون له..
شفاف يعني تخترقه كل انواع الاشعة..
شفاف يعني ما بيستر شيء وراه ولا حتى عورته..
شفاف يعني بفضح كل من استجار فيه ….
فهمت هسه …
المصداقية و الشفافية اهم منك واهم من اكلك وشربك وكهربتك وعلاجك ودراستك..
اهم من راحت بالك و اطمئنانك على مستقبل اولادك ..
ماشي كلامك بس فهمني احنا لويش بنوخذ مصاري من هذول المانحين ..
مش مشان نساعد المسخمين في لقمتهم وشغلهم ودراستهم وعلاجهم …
ليكون بنوخذ المصاري ميشان نظل نذبح فيهم..
ابدا هاي يا مختار مش راكبة.. ولا دخلت مخي ..
يا اخي بلا المصاري اللي مشانها ما بدك تنزل سعر الكهرباء..
يعني بدون المانحين بتنزل سعر الكهرباء …
ومع مصاري المانحين بيرتفع سعرها ..حتى نحافظ على المصداقية و الشفافية معهم ..
خف علينا و ارحمنا شويه …
استحي شوي انته المرة هاي يا مختار…. مصداقيتك معي انا والمقهورين …
شفافيتك معي انا و التعبانين …
مصداقيتك في اكلي وشربي وعيشتي وحياتي …
شفافيتك في تامين مستقبل اولادي …
مش مصداقيتك مع المانحين..
صحيح انو اللي استحوا ماتوا ..
صحيح انو المفاهيم انقلبت وصار ذيل الفرس احسن من الرصعة البيضاء على جبينه.