رسالة تشككني في أخلاق خطيبتي

أنا خاطب بنت وبحبها وأنا مسافر من 9 شهور على فرنسا في شغل..

وبهاد الوقت في حد بعت لي رسالة على الموبايل من الأردن، و بيقول لي إن خطيبتي كانت على علاقة بواحد قبل الخطوبة وتركته فترة وبعدين رجعت له مرة تانية ، وإنها ما زالت حتى الآن على علاقة معه و إنه بينصحني أبعد عنها لأنها مش كويسة، وما بده إني أوقع في نفس المشكلة اللي هو وقع فيها.

أنا ما عرفت لا المرسل ولا الرقم ، والرسالة وصلتني في وقت متأخر جدا بالليل، وأنا صحيت عليها وقريتها.

الصراحة أول ما قريتها ضحكت لأني الحمد لله عارف خطيبتي كويس وواثق جدا فيها، وأنا عارف إنه غالبا هاد الشخص كان نفسه يخطبها ولكن كان النصيب بيني وبينها .

الغريب إنه باقي على موعد العرس أربع شهور وإحنا مخطوبين من سنتين تقريبا، ليش هلأ قرر ينصحني؟
وكمان باعت لي اسم شخص وبده مني أخلي حد من أصحابي يتصل عليها ويقول لها إنه ‘ فلان ‘ عمل حادث وإنه في حالة خطيرة في المستشفى، حتى أشوف رد فعلها وعشان أتأكد إنه بيحكي بجد.

أنا ما صدقت الكلام هاد كله، وما رح أعمل هالشي اللي طلبه مني.. بس مش عارف شو أرد عليه ، وإلا ما أرد من أصله وأخليه هيك على ناره؟
خايف إذا ما رديت عليه إني اتاثر من ناحية خطيبتي في وقت من الاوقات أو أشك فيها..
شو بتنصحوني ؟؟