#يوميات_مسخسخ (13) … " تحبيني و أضحك عليكي "
يمكن كثير منكم بعرف مصطلح ( الكنكنة ) ، مصطلح باللهجة العامية ، يعني لما تكون قاعد بين صحابك و فجأة يجيك تلفون و تفز زي انذار الحريق و تبعد هيك عن صحابك و يحكولك ” كنكن .. كنكن ”
وفجأة تتحول من كائن ” خنشيري ” الى راغب علامة و ” آه حبيبتي .. يا روحي .. يا قلبي ..يا عمري .. يا حبي .. من شوقي الك دبت متت لا لا لا ” …. احم ..
هسا الكنكنة صفة تطلق على اثنين التقو في مول .. كافيه .. فيسبوك .. كازية .. المهم التقو بأي طريقة و شمطها الشب رقمو على قصديرة بكيت الدخان .. و رنتلو بنص الليل .. وهون ينطق الجملة السحرية ” انا كتير ارتحت لما شفتك !! ”
^ روّحـت .
ومن بعيد فيروز بتغني ” حبو بعضن .. حبو بعضن .. “
عاد بتبلش افلام التعارف ، وهون عندك 3 انواع من الشباب :
1- الشب ” المتمسكن” .. انا مسكين و بشتغل اربع خمس شغلات و ابوي بعطينيش مصروف و امي بتطبخلناش و انا بخلفش … !!
2- الشب ” العكيك ” .. انا ملياردير و معي سيارة و بيت و مدير شركة و ابوي كل يوم بسفرني و أواعي و Perfume من فرنسا و جاكيتي البني من سوق العبدلي .. عفوا جلد تمساح من اوكرانيا .. ( لعن الله شيطان معاليكم المحترم ) .
3- الشب ” الديونجي ” .. انا معلم ابوي بوجهو .. بتحسو و هو بحكي معك بعلك ذانو .. وخذلك قصص الرعب و افلام الطوش اللي عاملها ..
طبعا كلهم اعرط من بعض .. و كلهم بنفعو يخرجو افلام لهوليود .. وكلهم عاجبين بنات حارتي .. بموتو على هالشخصيات .. الا انا ولله ما حد بتطلع بخلقتي …
ومرة ثانية فيروز ” حبو بعضن .. حبو بعضن .. ”
وبعد ما تعجب و يدللها كاظم الساهر و يلحس عقلها زي مصاصة ام الشلن .. فجأة فيروز بتكمل ” … تركو بعضن .. تركو بعضن ”
اااه تركو بعضن .. مهو كان طالع على سيتي مول يزبط بنات …
وهي طالعة عرض ازياء .. شو أعمل اذا هي هبلا و ضحك عليها !!
بدل ما تجلي الجليات راحت على سيتي موووول تتزبط .. يا فرحتي هييي يمما ..
يا بنات ولله الجلي بسائل ” فيري ” احسن مليون مرة الطلعة على سيتي مول لتتعلقي بواحد ما بيسوى ليفة جلي .. وانتا يا هالشب “دشرك” من بنات هالعالم و روح إلحسلك مصاصة ام الشلن بدل لحس عقولهن هالمسخمطات !!