الخيزرانة

أبو مشافق يحادث ام مشافق:
-انا عارف عنه مشافق ….سميناه مشافق بس ما بشفق علينا !!
-اي هوه مشافق غريب؟؟؟…. مهو ابنك!!
-يا بنت الحلال بيّعنا الحيلة والفتيلة … وبعده عهالرشة من اول ماراح…كل شهرين زمان بودي برقية:( درهمونا والا فقدتمونا)..اي انا قاعد ع بنك؟؟(يشرب شاي بصوت مرتفع)
-هانت يا ابو مشافق ..كلها سنة زمان وبرجعلك  مشافق مهندس قد الدنيا…وبتصير ابو المهندس….. اجا ابو المهندس …راح ابو المهندس …قعدوا ابو المهندس …
-والله خايف اصير (ابو الحبوس ) قبل ما اصير ابو المهندس ..البنك بده مصرياته …والديينه بدهم قروشهم …..حتى أخوي مش صابر
-شو رايك تبيع الجدي  وتوديله المصاري؟
صوت صيا ح ديك…..ابو مشافق يخرج من باب بيته متثاقلا يتمطى وهو يحمل خيزرانه رفيعه:
(ابو مشافق يدخل الى المكان الموجود فيه الجدي ، ينظر الى الجدي المبطوح على الأرض ويقول بسخرية:
-نوم الهنا… يا عمي …. احنا بإيش وانته بإيش؟؟؟ ..نيالك ع فضاوة بالك…ماكل شارب نايم  ما ظل غير اجيبلك تلفزيون .
-شو ….متعشي إطراف …والا عليك توجيهي؟؟ .. مقضيها تقرا طول الليل!!؟
الجدي لا يستجيب ، فينحني ابو مشافق عليه فيكتشف انه ميت.
-شو ؟؟؟ ميت ؟؟؟ اي هوه ع خاطرأبوه يموت  وقت ما بده ؟؟؟
(الغضب الشديد يبدو على ملامح ابو مشافق ، يمسك الخيزرانة بشكل افقي ..ويضربها قليلا على يده اليسرى ، ثم ينظر الى الجدي ويهوي بها بسرعة عليه.
ابو مشافق يسأل الجدي بحدة ويهوي عليه بضربة مع كل سوال؟
-شو اللي جلطك يا تيس يا ابن التيس ؟؟
-عندك اعيال بقروا في الجامعة؟؟؟
-عليك كبيالات للبنوك؟
-عليك ديون للناس
-فواتير كهربا
-فواتير ميه
-مسقفات
-رسوم مجاري وتلفزيون وجامعة
-بدل ارصفة
-بدك حق بنزين  وكاز ؟؟
-شو اللي جلطك يا تيس يا ابن التيس ؟؟

يوسف غيشان