القواره ولا الفخاره..

ذاقت عليه الدنيا و اشتغل شفير تكسي…وهو خجلان.. بعد ما كان موظف محترم في ديوان القريه…

 ظل يلف و يترزق بالتكسي في قريه ثانيه حتى لا حدا يعرفوه….

وقفه واحد لابس بدله مزقزقه و لميعه و  حاط واكس على شعره و حلق في ذان وحده و سن ذهب و اربع خواتم في كل ايد…..

 

ما فكر كثير بمين هالمحترم و لا شو بشتغل… ركب معه و قاله عالميدان يا معلم…..

نقر ابو فهمي سويتش و اتكل عالله عالميدان…..

بنص الطريق اشرله نسوان كبار محترمات من شكلهم..  و قف و سالهم لوين.. و بالصدفه طريقهم نفس الطريق …

ابو فهمي قال هذول على طريقنا …ممكن يا محترم نوخذهم معنا….

المحترم رفض… و قالوه امشي و انا بعطيك زياده اللي كانو رح يدفعوه… بس ما تحملهم….

 

لويش دفعتلي اضافي. و النسوان ما مبين عليهم ايشي… شكلهم محترم و ما في شبهه عليهم و لا على شكلهم…

المحترم قالوه صحيح…. و ميشانهم انا ما بدي حدا يشوفهم بسياره انا راكب فيها…. لانوه الشبهه مش منهم…. الشبهه مني انا…

انا الميدان كله بيعرف شو بشتغل…. و اذا شافوهم نازلين من التاكسي اللي انا فيه…. رح ينشبهو و حرام علي احطهم بهيك موقف و خاصه انو مبين عليهم  انهم بنات ناس اوادم….

 

هسه  معقول هيك اخلاق موجوده عند اللي كنت افكره محترم و طلع قواره…..

شوف حبيبي حواليك و كلهم هيك……

هذا قواره و غيره فخاره…

فخاره مهمه قايمه بواجبها مع الكل و ما مخلي…..

و المدرس ينص و يعظ بالاخلاق الحميده و كمان ما مخلي حدا من شره…

حتى خالي الاعور من الفجر بيصحينا عالصلاه و ما مخلي حدا من لسانه…

 

اصحي يا ابو عناد انته قاعد بتحكيها بالمقلوب. المحترم زلمه عاطل و بيعمل كويس و مش مخبي انو عاطل و ما بدو يظلم الناس .. و هذا قواره…..

اللي انته بتسولف عنهم … مفروض انهم كويسين و بيعملو عاطل و مخبيين انهم عاطلين… و هذول فخاره….

 

مين احسن. من غير تشبيه……

يعني معقول اخلاق هالقواره ماشيه بخط مستقيم و ما بيكذب و ما شاء الله كل هذول وجهم شكل و قفاهم شكل….

اللي بدو يعطي جنسيه لاولاد بناتنا من جهه و من تحت لتحت بيظرب عكسها…..

بدو يقلل ديوننا و من جلدنا طلع زايدها و هو ما معوه خبر….

بدهم يزيدوا الغله من دوبلة التلفونات و بعدين اكتشفوا انه الغله نقصت….

ظل مترتح بالساعه و بعدين فجاه اكتشف انو لازم ياخرها…..

و لا ابو مظاهرات الشوارع و اول ما يخش ديوان القريه بيلعن سنسفيل كل واحد ماشي بالشارع…..

و القومجي و الاشتراكي و اللي بيتغزل بالعروبه و هو ساكن بفيلا و معارض على العروس لانها من غربا…

و اللي مدافع درجه اولى عن البيئه و نازل سلخ في المفاعل النووي.. و مرته اول وحده بتكب الزباله في الشارع…

و الثاني نازل كبس في الكازينو و هو ما بيقطع اسبوع عن كازينوهات قبرص و مصر و بيروت…..

الله يلعن القواره و الفخاره…طعمونا روح الخـــخـــخل……د. فاضل ألزعبي