الشتوي..

ما أن انتهى من صعود الدرجة الأخيرة في الطابق الثاني حتى بدأ يلتقط أنفاسه اللاهثة.. أسند رأسه على الحائط قليلاً وسأل ابنه: «وصلنا ولا بعد طابق»؟؟..فأشار يحيى إلى باب العيادة الزجاجي القريب ..دخلا إلى العيادة ..جلس أبو يحيى على أول كرسي صادفه في غرفة الانتظار بينما اقترب مرافقه من السكرتيرة:
السكرتيرة: شو اسم الحجي؟
يحيى: راضي عايش يحيى سالم «أبو يحيى»
السكرتيرة: مراجعة ولا أول مرة؟
يحيى : أول مرة!.
كتًبتْ «كرتاً» باسم الحجي وعمره وطلبت منهما الانتظار قليلاً..لحين الانتهاء من المراجعين السابقين…بعد نصف ساعة أشارت لهما بالدخول إلى غرفة الفحص..
الدكتور: ها حجي سلامتك!
أبو يحيى: الله يسلمك ويرضى عليك!.
الدكتور: من شو بتشكي حجي؟
أبو يحيى: والله يا بنيي..ما في اشي ..بس حاس حالي «متغيّر»..الجاكيت صاير واسع علي شوي..البنطلون بيسحل .. كأنه وزني نزل مرّة وحدة..
الدكتور : من زمان شاعر بنقصان الوزن؟
ابو يحيى: من يومين بس ..يوم الخميس كان وزني 74 من بعد الجمعة صار 71
الدكتور: بيومين نزل 3 كيلو؟
أبو يحيى: آه والله يا دكتور..
الدكتور: شهيتك للأكل كيف ؟
أبو يحيى: كويسة ما تغير عليها شي..
الدكتور: الحركة؟ النشاط؟
أبو يحيى: مثل أول وأحسن ما تغير اشي..
الدكتور: لا تكون بتقلق بالليل وما بتنام.
أبو يحيى : لا والله يا دكتور أني خُم نوم..بصلي العشا وبنام للصبح..
الدكتور : طيب في أدوية جديدة أخذتها اشي؟
أبو يحيى: لا والله يا بنيي!
الدكتور : فحصت سكّري؟؟
أبو يحيى: سويت فحص ابو 3 ليرات قالولي ما فيك اشي..
الدكتور : غريب شو اللي خلى وزنك ينزل بهالسرعة مش عارف يا حجّي !!! لا يكون الميزان «تبعك» تغيّر..
ابو يحيى : نفس الميزان الله الوكيل.
***
هنا تدخل ابنه يحيى ليحكي ضميره وينقذ الطبيب من موقف التخمين وينشله من حيرته في نفس الوقت..
يحيى : ممكن احكي يا دكتور!!…
الدكتور : طبعاً..تفضّل !
يحيى : في شغلة يمكن مش خاطرة ع بالك.. أبوي يوم الجمعة تحمّم و»شلح كل الشتوي» اللي لابسه..لهيتش شعر انه وزنه نقص والجاكيته صارت واسعة والبنطلون بيسحل!..أما جسمه هو هو…وصحته هي هي..
هنا مزّق الدكتور الورقة التي أمامه وبدأ يتمتم شاتماً ساباً حظّه الأسود الذي قاده لمهنة الطب في زمن «التحزير»..
***
بناء على ما سبق، ولكل الذين يحللون ويقدّمون تشخيصاً متأنياً في «التغيير الحكومي» الأخير ..انا لم أرَ «تغييراً» يذكر.. سوى أن الحكومة «شلحت الشتوي» بس..والباقي هو هو..

ahmedalzoubi@hotmail.com