زوجي طفل

وكالة الناس – أنا سيدة عمري 35 سنه مدرسة ومتزوجه صارلي 8 سنين وعندي 3 بنات وجوزيه أكبر مني بسنتين
والحمد لله دخلنا ممتاز ومش محتاجين حدا . . .بحب زوجي كتير . . . بس للأسف عنده صفات ما بحبها نهائيا .

إنه . . جوزي مش رزين بالمرة وعنده حركات شعشطة كتير وخصوصا لما ييجي أهله عنا . . .
بلم إخوانه حواليه وبيقعد يحكيلهم نكت ومواقف صارت معاه وبيوصل صوت ضحكهم للسما . . . وأنا بكون أغلي غلي .

وللا يمة يمة ياحبيبتي لما يلعبو شدة . . . . بحس جوزي صار شخص تاني مش اللي بعرفه . . بقعد يعمل حركات وأكروبات عشان يضحك إخوانه .

ويبسطهم . . مرة دخلت عليهم اقدم الشاي لقيته ماسك كروت الشدة وبوقعهم كرت كرت فوق راسه . . حكتلة شو اللي بتعمله هاد . . . قال لي كنا متشارطين اللي بخسر يتحمم بالشدة
دايما بحكيلة يا زلمة إركز . . إرزن . . بلاش هبل . . بس عالفاضي كل كلامي بتلاشى .

كمان في خصلة عنده بتقهرني . . إنه . . .مرات بحكي مع أولاد اخوانه الصغار وبيعمل حالو بعبوع عشان يخوفهم وبلحقهم زحف من قرنه لقرنه . . . وبيكيف لما يهربو منو في كل اتجاه .

وهاد الشي بيحرجني كتير قدام سلفاتي . . مرة وحدة من سلفاتي شكتلي وقالت انه ابنها سخن لما جوزي خوفه .

وعملتله يومتها مشكلة للسما وحلف عمره ما يقرب على ولد صغير بس كله حكي . . . بيوقف شوي . . وبرجع يعمل حركات من أول وجديد .

انا زهقت ومش عارفة شو بدي أعمل معاه . . شو رأيكم . . كيف ممكن أحل مشكلة جوزي؟؟

–