بالعامية ( كلنا محللين ) .. بقلم سرهاب البسطامي

والة الناس – كتب سرهاب البسطامي … مرحبا .. اليوم ما بدي احكي بالفصحى خليني احكي ( بالعامية ) .. بصراحة انا كثير بحب الوطن العربي لا عفواً .. انا ما بحبه انا صرت اعشقه عشق .. وما شاء الله علينا احنا في هذا الوطن الغالي مو مثل غيرنا .. طبعا في اختلافات كثيرة بينا وبين الشعوب الثانية .. يعني على سبيل المثال .. احنا محللين في كل المجالات .. وما في شي ما بنعرفه .. لما نحضر مباراة كرة قدم ولا في مثلنا كلنا بنصير محللين رياضيين .. يعني تحكي انوا احنا مضيعيين عمرنا في التحليل ومعرفة تاريخ كرة القدم وتاريخ الاندية لا ويا ريت هيك كمان كلنا بنصير محكمين ما شاء الله علينا .. يعني من الآخر احنا كلنا معانا شهادات عليا في كرة القدم .. ولا تنسى بجوز واحد يقنعك انوا ميسي بلعب مع ريال مديد .. او حتى انوا اصلوا عربي .. او حتى انوا كا س العالم بيجي كل سنتين مرة .. فـــ عادي ..

طيب يا جماعة .. مش مشكلة خلينا نحكي في ناس كثير مدمنين كرة قدم ومن كثر ما بحضروا مباريات صاروا اكثر من محللين .. بس لما بصير حادث بين سيارتين .. معقول يا جماعة كلنا بنصير هون نحلل الحق على مين .. يعني كلنا بصير معانا شهادات من قسم السير والمرور .. لا ومش هون كمان .. يا جماعة بصل التحليل لسرعة المركبة .. قديش كانت كل مركبة سرعتها .. ومستعد يناقشك ويقنعك كمان ازا المرور حطوا الحق على السيارة رقم (1) بصير الكل يناقش ويحكيلك لا الحق على السيارة رقم (2) وبشتغل هون التحليل .. ولا تنسى بجوز واحد يقنعك انوا السائق رقم (1) ما معاه رخصة وبجوز يقنعك .. فـــ عادي ..

خلينا نحكي بجوز من كثر ما في ناس بتسوق اكيد صار عندهم خبرة .. بس شو بالنسبة للسياسة والاقتصاد .. يعني مش معقول كلنا سياسين واقتصاديين .. يعني ما بتقعد قعدة الا وازا واحد فتح سيرة بالوضع الاقتصادي والاخ فهمان شوي وعنده بعض المعلومات وحابب يسلي حاله في القعدة .. كلها بتصير تحلل معه وبناقشوا نقاش ما بعده نقاش بصير هو نفسه يحكي يا ريت ما فتحت السيرة شو كان بدي فيها .. وازا واحد فتح سيرة شو صار في الدولة الفلانية بصير كل القاعدين محللين سياسيين وشو الاسباب وكمان بعطيك شو الحلول .. ما شاء الله علينا .. الله يحرسنا من العين ..

لا والاهم من هيك .. بتكون قاعد قعدة بنط واحد بحكيلك راسي بوجعني .. هون كل القاعدين بقلبوا دكاترة بلمح البصر شو اسباب وجع الراس وشو الحلول لتخفيف الالم واحد بحكيلك ضربة شمس والثاني بحكيلك الضغط مرتفع وبتصير حلبة مصارعة بينهم ومين هو البروفسور اللي راح يردوا عليه في الآخر .. الله يحماكم ويحرسكم من العين يا دكاترة ..

طيب شو بالنسبة للدين .. يعني انا بحكي لغاية هون وبكفي محلل رياضي وماشي محلل سياسي واقتصادي وماشي ومحلل سير ومرور ماشي .. دكاترة وماشي .. بس تكون مفتي وتصير تفتي باشي بتعرفه واشي ما بتعرفه .. انا هون بحط الف علامة استفهام .. يا سيدنا الشيخ ..

يا جماعة .. الله يحرسنا من العين .. ما شاء الله علينا .. بنفهم في كل شي .. يعني حلو الواحد يكون بعرف كل شي .. وعنده بعض المعلومات عن الاقتصاد والسياسة والرياضة و…. الخ .. بس ما نزودهاش كثير عنجد .. لانه مناقشاتنا بصراحة بتتطور لمد الايدين والغلط على بعض بسبب بعض المناقشات اللي احنا يا دووووب عنا فيها بعض المعلومات .. ومنقلب القعدة نكد من ورى تحليلاتنا ومناقشاتنا .. حتى النشرة الجوية عدم المؤاخذة احنا في فصل الصيف مستعد واحد يناقشك ويقنعك ويحلل انوا بكرة في شتاء او حتى ثلوج ودير بالك بجوز يقنعك .. او حتى يقنعوك انوا احتمال كبير العيد يجي قبل شهر رمضان ..

يا جماعة .. صح انا زودتها شوي بس اكيد واقع اجتماعي .. احكيلكوا شغله .. ولا بلاش خلص .. كل عام وانتوا بخير بمناسبة شهر رمضان المبارك .. وربنا يغفرلنا ذنوبنا جميعا ..

طاب وقتكم جميعا ..

سرهاب البسطامي …