نجلاء بدر تروي كواليس تعاونها الأول مع خالد يوسف: “كان ممشينا زي الجيش”

وكالة الناس –  كشفت الفنانة نجلاء بدر كواليس تعاونها الأول مع المخرج خالد يوسف في مسلسل “سره الباتع”، والذي عُرض بموسم دراما رمضان الماضي، وحقق نجاحاً كبيراً، مشيرةً إلى أنه واجه العديد من الصعوبات أثناء تصوير أول أعماله الدرامية.

وقالت نجلاء: “الموضوع كان شاقاً جدًا، لأن فيه لوكيشن الزمن القديم والمعاصر ولوكيشن ريفي وفلاحي وبيصور في رمضان ومعاه جيش من الممثلين وتفاصيل كتير في المسلسل، وبيكون موجود في اللوكيشن من الساعة 5 الصبح، وكان ممشينا زي الجيش”.

وأضافت: “كان بيقود كل الناس بكل أدب واحترام، أنا افتكرت هيزعق أو هنتبهدل كلنا لكن محصلش كده، وفي مرة واحد من المجاميع بوظ المشهد وكان مشهد فيه تفجيرات قاله: “ليه يابني.. مش حرام مجهود الناس نعيده تاني؟ ففضلت بتفرج عليه وبقول هو جاب الصبر ده منين، وعاتبه فقط ومشخطش فيه”.

وأردفت نجلاء بدر: “وفي مرة تانية زعق لحد دون ما يقصد عشان قطع مود نجمة كانت بتحضر نفسها للعياط، وأول ما عيطت دخل عمل حاجة وبعد ما زعق فيه اعتذر له قدامنا كلنا وقاله: “لازم تحس بالفنان أنا قاعد مستني الفنانة تعيط بقالها نص ساعة، فيه تفاصيل بصراحة مقدرش أنكرها وأبقى إنسانة قليلة الأصل والاحترافية لو مذكرتهاش”.

أما عن رأيها في الانتقادات المستمرة الموجهة لخالد يوسف، قالت: “مين متهاجمش؟ أفلام المقاولات اتهاجمت وإيناس الدغيدي ويوسف شاهين اتهاجموا، كل واحد له مدرسته”.

واختتمت نجلاء بدر حديثها عن خالد يوسف قائلةً: “حبيت خالد يوسف أكتر في السينما، صعب عليّا في الدراما، كان بيجي شيك أوي ونضيف أوي وبيمشي متبهدل وشعره متنعكش وكله تراب”.