يوميات ابو ديبو .. الحلقة الرابعة والعشرون .. للكاتب سرهاب البسطامي

وكالة الناس – خاص وحصري – يوميات ابو ديبو .. الحلقة الرابعة والعشرون .. للكاتب سرهاب البسطامي
عنوان الحلقة : امتحان لغة عربية

** ابو ديبو يدخل على ابنه ديبو في غرفته وهو يدرس امتحان اللغة العربية .

ابو ديبو : يعطيك العافية يابا يا ديبو .
ديبو : هلا هلا يابا – الله يعافيك ويطول في عمرك
ابو يبو : شو بتعمل يابا .
ديبو : بدرس يابا بكره عندي امتحان لغة عربية .
ابو ديبو : الله يوفقك يابا بدي تشد عزماتك وتنجح وترفع راسي .
ديبو : ولا يهمك يابا ذيبك .
ابو ديبو : ما شاء الله عنك طالع لابوك بتفهم – هات اشوف هالكتاب .
ديبو : تفضل يابا .
ابو ديبو : في لحظة اصبح دكتور لغة عربية ويقول لابنه : يعني يابا اذا سالتك اي سؤال بتجاوبني .
ديبو : ولو يابا قلتلك ذيبك انا .
ابو ديبو : طيب يا فهمان – شو مفرد الكلمات التالية : اطباء .
ديبو : طبيب يابا .
ابو ديبو : عفيه عليك ان شاء الله بشوفك احلى طبيب وبرفع راسي فيك
ديبو : ان شاء الله يابا ان شاء الله بوجودك معنا .
ابو ديبو : طيب يابا قلتلي بوجودك معنا .. طيب يا فهمان شو مفرد كلمة مهندسين .
ديبو : مهندس وما بدها اثنين يحكو فيها يابا .
ابو ديبو : ممتاز عفيه عفيه عليك ان شاء الله بشوفك مهندس .
ديبو : هو انا يابا بدي ادرس كل هالتخصصات .
ابو ديبو : بمزح معك يا يابا – طيب شو مفرد كلمة طيارين .
ديبو : طيار يابا ولا تقلي ان شاء الله بشوفك طيار لانه عندي فوبيه من الطيارات .
ابو ديبو : ههههه طيب يابا قلتلي فوبيه اه .. طيب شو مفرد كلمة مصايب
ديبو : مش معانا هاي يابا من وين جبتها يابا ..
ابو ديبو : شو من وين جبتها من عقلي بتعرف ولا لأ ؟
ديبو : ولو انها مش في المنهاج يابا بس بعرف شو اجابتها .. مصيبة يابا – الله يبعد عنا المصايب .
ابو ديبو : غلط يابا
ديبو : ليش غلط يابا .
ابو ديبو : لانه كلمة مصايب هي الكلمة اللي ما الها مفرد لانه يابا المصايب لما بتيجي على الواحد بتيجي مرة وحدة ؟؟!!

انتهت الحلقة الرابعة والعشرون ..

هذه الحلقة ستكون مرئية على الشاشات .. رمضان 2016

لمتابعة وزيارة صفحة الكاتب سرهاب البسطامي على صفحته على الفيس بوك الدخول على الرابط التالي

https://www.facebook.com/serhabboustami