يوميات ابو ديبو .. الحلقة السابعة عشر .. للكاتب سرهاب البسطامي

وكالة الناس – خاص وحصري – يوميات ابو ديبو .. الحلقة السابعة عشر .. للكاتب سرهاب البسطامي
عنوان الحلقة : ابن حلال

** ابو ديبو يعود للمنزل مسرعاً وينادي على زوجته ام ديبو وابنته :

ابو ديبو : ام ديبو يا ام ديبو وينك يا حرمة .
ام ديبو : هيني يا رجال خير شو في ليش بتصرخ .
ابو ديبو : وين بنتك .
ام ديبو : هيها في غرفتها يا رجال خير شو في .
ابو ديبو : روحي ناديها وتعالي خلينا نحكي جوز كلام .
ام ديبو : خير في اشي ..
ابو ديبو : استغفر الله العظيم .. وبعدين معك يا حرمة .. روحي ناديها وبعدين بتعرفي كل اشي .. يا الله شو شو ما عندك صبر .. بدك تعرفي كل اشي بالوقت والدقيقة ..

** ام ديبو تحضر هي وابنتها ويجلسون مع ابو ديبو في غرفة الجلوس .

بنت ابو ديبو : خير يابا قال عاوزني خير ان شاء الله .
ابو ديبو : اسمعي يابا انا روحت سالت على الرجال اللي اجى يخطبك .

** بنت ابو ديبو تقاطع ابو ديبو انا يابا قلتلكم …. ولا تكمل حديثها .

ابو ديبو : خليني اكمل حكي يا بنت بقولكم انا روحت سالت عن الرجال وطلع ابن حلال ومتعلم ومثقف وما شاء الله عليه بوخذ راتب كويس يعني انا هسه بقدر اطمن عليكي يابا .

بنت ابو ديبو : يابا انا حكتلكم هذا الرجال ما بناسبني .
ام ديبو : ليش ما بناسبك يما والله الشاب ما شاء الله عليه ما بعيبو اشي وهي ابوكي بحكي انوا طلع ابن حلال وبوخذ راتب كويس .
بنت ابو ديبو : افهموني هاذ الرجال متخلف .
ابو ديبو : متخلف ؟؟!! كيف يعني متخلف ؟؟ مش لما اجى هون هو واهله مش قعدتوا مع بعض يابا وتناقشتوا كيف بتحكي متخلف شفتي منوا اشي يعني ؟؟
بنت ابو ديبو : اه متخلف لانه ما عندو بلاك بيري وما عنده واتس اب ولا فيس بوك ..

انتهت الحلقة السابعة عشر

.. هذه الحلقة ستكون مرئية على الشاشات .. رمضان 2016

لمتابعة وزيارة صفحة الكاتب سرهاب البسطامي على صفحته على الفيس بوك الدخول على الرابط التالي https://www.facebook.com/serhabboustami