يوميات ابو ديبو .. الحلقة التاسعة والعشرون .. للكاتب سرهاب البسطامي

وكالة الناس – خاص وحصري – يوميات ابو ديبو .. الحلقة التاسعة والعشرون .. للكاتب سرهاب البسطامي 
عنوان الحلقة : مأساة في الجامعة

** ابو ديبو مع زوجته ام ديبو بحوار عائلي :

ابو ديبو : بتعرفي يا ام ديبو قبل ما اتجوزك كانت حياتي مختلفة .
ام ديبو : كيف يعني مختلفة . يعني قبل ما تتجوزني كانت حياتك احلى مثلا .
ابو ديبو : خذلك صارت تتفلسف ام العريف يا حرمة مش هيك قصدي .
ام ديبو : ولا كيف يعني مختلفة فهمني .
ابو ديبو : يعني كانت حياتي كلها مرمطة وخاصة في الجامعة .
ام ديبو : ااااه هسه فهمت – طيب كيف كانت مرمطة .
ابو ديبو : يعني يا ام ديبو كنت بعد ما اروح من الجامعة كنت اروح اشتغل على شان الحق اجيب اقساط الجامعة لانه اهلي ما كان معهم يدرسوني وكانت حياتي مرمطة ويا دوبك اللي اقدر الحق ادرس معاناة يعني معاناااه .
ام ديبو : ومين سمعك يا زلمة انا كنت اروح من الجامعة اشتغل شغل البيت وادرس اخواني الصغار ومش ملحقة ع الضيوف وما كان في وقت للدراسة من اصله .
ابو ديبو : والله يا ام ديبو وغير هيك كنت في الجامعة اروح بنفس البنطلون ونفس القميص يعني في الجامعة كنت معروف الله وكيلك يعني حياتي كانت مرمطة .
ام ديبو : ومين سمعك يا زلمة اصلا انا ما كان عندي غير جلبابين واحد اشتري ع العيد الصغير وواحد ع العيد الكبير واروح واجي فيهن .
ابو ديبو : والله يا ام ديبو آآآآآخ شو بدي احكي تاحكي كنت لما اروح على الجامعة يا دوبك اللي بالاسبوع اشتري فنجان قهوة واحد على شان اوفر – يعني في الجامعة حياتي كانت مرمطة .
ام ديبو : ومين سمعك يا زلمة انا كنت اخد معي قهوتي من البيت في تيرموس صغير على شان يا دوبك اهلي كانوا يعطوني مصروف المواصلات . وانت بتعرف شو مصاريف الجامعة .
ابو ديبو : يا حرمة بتعرفي .. بدي احكيلك شغلة .. واقفة في زوري ..
ام ديبو : احكي يا زلمة ولو ما تخلي اشي بنفسك .
ابو ديبو : بتعرفي يا حرمة انا مش حاسس حالي اني بشكيلك في همي .
ام ديبو : ولا يا زلمة شو حاسس حالك .
ابو ديبو : شو حاسس حالي .. حاسس حالي انوا احنا منتسابق .

انتهت الحلقة التاسعة والعشرون ..

هذه الحلقة ستكون مرئية على الشاشات .. رمضان 2016

لمتابعة وزيارة صفحة الكاتب سرهاب البسطامي على صفحته على الفيس بوك الدخول على الرابط التالي
https://www.facebook.com/serhabboustami