يوميات ابو ديبو .. الحلقة العاشرة .. للكاتب سرهاب البسطامي

وكالة الناس – خاص وحصري – يوميات ابو ديبو .. الحلقة العاشرة .. للكاتب سرهاب البسطامي
عنوان الحلقة : حرب غزة

** ابو ديبو عصبي جداً ويتكلم مع زوجته ام ديبو وهو امام التلفاز ويهدد ..
** ( القناة الموجودة تتكلم عن حرب غزة )

ابو ديبو : والله غير نورجيهم والله لنقصفهم والله لندمرهم غير نشجب ونستنكر وندين صار في مؤامرة علينا يا ام ديبو اللي صار اشي مش معقول ومش طبيعي .
ام ديبو : طول بالك يا ابو ديبو على شان ضغطك يا زلمة — ربنا كبير وقادر على كل شي .
ابو ديبو : اتركيني في همي يا ام ديبو والله ما انا متحمل حالي والله اللي فيه مكفيني .
ام ديبو : يا ابو ديبو ان شاء الله غير ربنا ينصرنا بس انت هدي حالك .
ابو ديبو : كيف احكيلي كيف سبع صواريخ مش حرام عليهم يا ام ديبو مش حرام .
ام ديبو : افرح يا زلمة هيهم قاعدين بطلعولهم من تحت الارض ومرعبينهم واليوم اطلقوا عليهم صواريخ لو تشوفهم وهمه بتخبوا في الملاجئ .
ابو ديبو : شو ملاجئ وارض وصواريخ يا حرمة انتي انهبلتي عن ايش انتي بتحكي .
ام ديبو : يا زلمة انا بحكي عن اخوانا في غزة .
ابو ديبو : يا حرمة آآآآآ خ منك آآآآخ – انا وين وانت وين انا بحكي عن اشي ثاني .
ام ديبو : عن ايش بتحكي انت يا زلمة .
ابو ديبو : انا بحكي عن مباراة البرازيل والمانيا قصفونا الالمان سبع اهداف يا حرمة .

** هنا يكون ابو ديبو ممسكا بجريدة مكتوب عليها المانيا تسحق البرازيل 7-1 في كاس العالم 2014 .

انتهت الحلقة العاشرة ..

هذه الحلقة ستكون مرئية على الشاشات .. رمضان 2016

لمتابعة وزيارة صفحة الكاتب سرهاب البسطامي على صفحته على الفيس بوك الدخول على الرابط التالي https://www.facebook.com/serhabboustami