صوّر يا مصوّر
قال الرجل لصاحبه:
– يا رجل كلشي اتغيّر….. كنت قبل كمّن سنة ادخل ع السوبرماركت ومعي 5دنانير، أوخذ جاج ومرتديلا ونسكافيه وشيبس وشوكولاته ورز وسكر ..وارجع ع الدار وبعد فيه معي مصاري ….هلا صار الموضوع صعب ..بتفوت ع السوبرماركت ومعك خمسين دينار ع الأقل تاتجيب نفس الأغراض، وبترجع ع الدار ما معك شلن.
قال صاحب الرجل اندهاش:
– لكن يا رجل انته عن اي بلد بتحكي؟ .
– عن الأردن ..عن هون
– صحيح الأسعار ارتفعت في الأردن، لكن ما عمرها كانت رخيصة زي ما بتحكي …. بخمس دنانير بتوخذ جاج ومرتديلا ونسكافيه وشيبس وشوكولاته ورز وسكر ..وبترجع ع الدار وبعد معك مصاري …. تخنتها.
– لا ما تخنتها ..هالحكي صحيح ..
– طب كيف كنت توخذ هاي الأغراض بأقل من خمس دنانير؟؟…خذني ع قد عقلي ..وفهّمني.
– أقوللك؟؟….كنت أوخذها ببلاش .
– وليش هلاّ بطّلت تقدر؟؟
– لأنهم صاروا ايحطوا كاميرات مراقبة في المحلات!!
ترى …هل نحتاج الى كاميرات، مثل كاميرات دائرة السير والدوائر الأخرى، لكنها كاميرات تراقب كل من يهبش المال العام .
وتلولحي يا دالية