أحبها جدا..دعواتكم أن تكون من نصيبي

سرايا – انا شاب عمري 26 سنة بحب وحدة حب عفيف و طاهر من 9 سنين عمري ما حكيت معها او كلمتها إلا في فترة الثانوية لما كنت امشي وراها وألاحقها بس بعد التوجيهي ما شفتها بس ظلت في فكري ووجداني كنت بفكر فيها 24 ساعة وما بتروح من عقلي و بالي

تعلمت برا وخلصت تعليمي ورجعت بعتت لها اني بدي إياها على سنة الله ورسوله وهي ردت : إن الرأي من رأي اهلي .. وانا كتير انبسطت !

انا ببني شقة ولكن وضعي المادي مضغوط شوي فقلت أؤجل الخطوبة شوي .. المهم تفأجات بعد اربع شهور انه في ناس متقدمين لها ..انا ساعتها ما عرفت شو اعمل حكيت لابوي وامي وهم بيعرفوا الموضوع ، فقالوا اليوم نحكي مع اخوها واخوها بيعرفني معرفة جيدة

اليوم أبوي حكى معه و رجع بعد صلاة العشاء على البيت والدموع في عيونه وامي بتبكي.. حكيت : شو صار اليوم ؟ قال لي : انا حكيت بالموضوع مع أخوها وقال انه الجماعة حاكيين في المهر ومتفقين على كل شي من حوالي 15 يوم ولو ابنك حكالي قبلها كان جبتها لباب بيته لانه ابنك عزيز علي .. بس اللي صار إنه أنا وإخواني اعطينا الناس كلمة و الموضوع صار علني.

ابوي قال له : الله يبارك لهم ويا سيدي ابنتكم ابنتي والله يسعدها ويهنيها !! بس للعلم ما صار خطبة رسمية لحد الان ولا جاهه ولا قراءة فاتحة بس اتفاق مبدأي..

فاناااااا بدي اموت بدي افقع .. ياااااااا الله.. قدام اهل البيت بعمل حالي مش مهتم وبس ادخل غرفتي بغرق في دموعي مش قادر والله اتصور انها تنزف لغيري

والله العظيم قلبي نار ببكي من القهر وبصرخ من صميم القلب يا رب خذ مني ما تشاء وامنحني اياها
ياااا الله شو صليت ودعيت طول عمري وفي كل صلاة بدعي إنها تكون من نصيبي

يااااااااااالله ما الي غيرك … امانة يا جماعة الخير ادعوا تكون من نصيبي يمكن دعوة منكم تنفعني 
يا رب لا تكسر لي قلبا ولا تصعب علي امرا